【我向山竹許咗個望，而家好Ｌ後悔】
９月16日凌晨四處吹起強勁猛風，風神「山竹」即將降臨！
我跑咗上天台，抵抗住猶如猛獸般嘅強風，走到天台邊緣，做咗一件成世人最後悔嘅事…
「神啊！我真係好唔鍾意返工，唔想再對住公司嗰隻成臉巢皮嘅惡雞乸啊！」
我仰天長嚎，突然一陣怪風從下吹起，幾乎將我整個人吹起，我臨危不亂，好似相撲手咁扎穩馬步，大叫一聲「破」。但狡猾嘅風竟然將我上衣吹走，害我赤裸半身！
「我繼續返工，我就嚟痴線啦！做人都係為咗開心啫！我求吓你啦！畀個十號風球我！我想開心吓啊！」
當晚，我企咗喺天台好耐，個天無畀任何即時回應我。
一直赤裸上身有啲凍，仲開始落濛濛細雨，於是我只好返屋企，期待「山竹」帶畀我嘅一絲快樂。
第朝一起身，發高燒。
我食完藥訓咗半日，望出街，外面好似世界末日咁，冧樹處處，一片狼藉。
本來以為上帝聽到我嘅呼喚，想畀我放一日假。
不過，我發現自己有啲唔對路…
上帝並無改變「山竹」嘅路徑，而係改變咗我。
我回憶返自己喺天台許嘅願望…
上帝將我變到好鍾意返工啊！！
天都未光，我就打開電視，見到已經變返三號風球。我竟然開心到原地跳起，振臂大叫：「Yeah！可以返工喇！」
我吹住口哨，心情靚絕咁穿上靚西裝，出門口返工。
落到樓下大堂，見到大廈保安，我向佢打招呼：「早晨啊！你都返緊工啊？！Yeah！」
雖然馬路兩旁嘅大樹幾乎全數倒塌，仲擋住成條馬路，不過擋唔住我想返工嘅心情！我大叫一聲「Go！Go！Go！」就衝入去。
我雙手護頭，好似美式足球員咁衝入樹叢，任由尖銳嘅樹枝將我割傷，只要更接近公司半步，呢少少痛楚我唔怕！
皇天不負有心人，我終於嚟到港鐵站，見到站內人山人海，一問之下原來港鐵停駛。我好似沙甸魚咁被人群擠壓。
我完全感受到香港人想返工嘅熱情，企喺我旁邊就有一位熱情的大嬸，佢未返工已經著住件快餐店員工制服。
「I know that feel 大嬸！」由於實在太逼，我無辦法畀大嬸一個擁抱，只可以向佢大力點頭。
「發神經…」大嬸。
足足花咗三個鐘頭，我終於返到公司。我高舉雙臂，好似馬拉松選手咁衝入公司然後打卡，大叫：「衝線！我返到公司喇！」
我一返埋自己位，一陣窩心嘅暖流從屁股一直沿脊椎竄上後腦，我不禁感動得流下男兒淚。
有啲返咗公司嘅同事安慰我，話唔應該期望打風有假放，最緊要性命安全，好多流浪貓狗同樹木都受盡風雨摧殘。
「我唔准你哋詆毀我對工作嘅熱情！」就喺呢個時候，公司隻惡雞乸行埋嚟我個位，質問我點解咁耐先返到公司。
「多謝妳咁關心我啊，我會努力工作彌補返失去嘅時間！」唔知點解，今日我覺得惡雞乸好靚，佢充滿褶皺嘅臉孔，好似聖母一樣咁慈祥。
夜晚我睇新聞時真係好感動，好多打工仔都好似我一樣，對工作非常有熱誠，甘願攀山涉水搭幾百蚊的士，就係為咗將生命奉獻畀公司。
當然啦，仲要多謝特首嘅彈性處理，令鍾意返工嘅打工仔如願以償。
就好似我一開始所講，做人最緊要開心。
正所謂山不轉路轉，路不轉人轉，人不轉心轉。
喺香港咁十級荒謬，連膠紙都可以炒到成舊水嘅環境下，
唔改變思路，根本無可能開心生活。
嚟啦各位打工仔，同我一齊打開窗向住夜空大嗌：「我好Ｌ鍾意返工啊DLLM！」
（可能待續）
*喜歡故事，請花半秒like & share＊
Search